विश्वकै प्रमुख प्रविधि कम्पनीमध्ये एक एनभिडियाको नेतृत्व अब कोलेट क्रेसले सम्हाल्ने भएकी छन्।
एनभिडियाले बिहीबार जारी गरेको विज्ञप्ति अनुसार कम्पनीकी प्रमुख वित्तीय अधिकृत (सिएफओ) क्रेसलाई अन्तरिम प्रमुख कार्यकारी अधिकृत (सिइओ) नियुक्त गरिएको हो।
क्रेसले अन्तरिम सिइओको जिम्मेवारी सम्हाल्दा सिएफओको पद पनि निरन्तर सम्हाल्नेछिन्। स्थायी सिइओ नियुक्तिका लागि आन्तरिक र बाह्य दुवै उम्मेदवार खोजिने कम्पनीले उल्लेख गरेको छ।
यसअघि सिइओ रहेका जेन्सेन हुआङले अध्यक्ष, प्रमुख कार्यकारी अधिकृत र सञ्चालक समिति सदस्यबाट राजीनामा दिएका कम्पनीले जनाएको छ। कम्पनीले राजीनामाको कारण भने खुलाएको छैन। रोयटर्सले भने हुआङलाई सञ्चालक समितिले पदबाट हटाएको जनाएको छ।
हुआङको बहिर्गमनपछि एनभिडियाको नेतृत्व सम्हाल्ने क्रेस कम्पनीको वित्तीय व्यवस्थापनमा लामो अनुभव भएकी अधिकारी हुन्। उनी सन् २०१३ देखि एनभिडियाको प्रमुख वित्तीय अधिकृतका रूपमा कार्यरत छिन्।
क्रेस सन् २०१३ सेप्टेम्बरमा एनभिडियामा कार्यकारी उपाध्यक्ष तथा प्रमुख वित्तीय अधिकृतका रूपमा जोडिएकी थिइन्। त्यसयता उनले कम्पनीको वित्तीय नेतृत्व सम्हाल्दै आएकी रोयटर्सले जनाएको छ।
कम्पनीको वित्तीय अवस्था, लगानी, योजना तथा व्यावसायिक रणनीतिमा उनको महत्त्वपूर्ण भूमिका रहँदै आएको छ। कम्पनीको त्रैमासिक वित्तीय नतिजा सार्वजनिक गर्दा उनी हुआङसँगै लगानीकर्तासमक्ष उपस्थित हुँदै आएकी छन्।
एनभिडियामा आउनुअघि क्रेसले प्रविधि क्षेत्रका ठूला कम्पनीमा झन्डै २५ वर्ष वित्तीय क्षेत्रमा काम गरेकी थिइन्।
उनले टेक्सास इन्स्ट्रुमेन्ट्समा आठ वर्ष वित्तीय जिम्मेवारीमा काम गरिन्। त्यसपछि सन् १९९७ देखि २०१० सम्म माइक्रोसफ्टमा रहिन्।
माइक्रोसफ्टमा काम गर्दा सन् २००६ मा उनी सर्भर एन्ड टुल्स डिभिजनको प्रमुख वित्तीय अधिकृत बनेकी थिइन्। उक्त जिम्मेवारीमा उनले वित्तीय रणनीति, योजना र प्रतिवेदन सम्बन्धी काम सम्हालेकी थिइन्।
सन् २०१० मा क्रेस सिस्कोमा वरिष्ठ उपाध्यक्ष तथा प्रमुख वित्तीय अधिकृतका रूपमा जोडिइन्। त्यहाँ उनले कम्पनीको बिजनेस टेक्नोलोजी तथा अपरेसन फाइनान्स संगठनको वित्तीय रणनीति र व्यावसायिक विकासको जिम्मेवारी सम्हालेकी थिइन्।
सन् २०१३ मा उनी एनभिडियामा पुगेकी हुन्।
रोयटर्सका अनुसार क्रेसले युनिभर्सिटी अफ एरिजोनाबाट फाइनान्समा स्नातक गरेकी छन्। उनले साउदर्न मेथोडिस्ट युनिभर्सिटीबाट व्यवसाय प्रशासनमा स्नातकोत्तर (एमबिए) गरेकी छन्।
यी शैक्षिक विवरण एनभिडियाले अमेरिकी धितोपत्र तथा विनिमय आयोगमा बुझाएको वार्षिक प्रतिवेदनमा उल्लेख छन्।
फर्च्युन पत्रिकासँग सन् २०२४ मा कुरा गर्दै क्रेसले एनभिडियामा प्रवेश गर्दा आफूले काम गरेका कम्पनीमध्ये यो सबैभन्दा सानो कम्पनी भएको बताएकी थिइन्।
तर त्यसयता एनभिडियाको आकार र कारोबार दुवै तीव्र रूपमा विस्तार भएका छन्। कम्पनीको यही विस्तारको वित्तीय व्यवस्थापनमा क्रेसले लामो समय काम गरेकी छन्।
क्रेस एनभिडियाको वित्तीय नेतृत्वमा मात्र सीमित छैनन्। कम्पनीमा रहेको उनको सेयरले पनि उनलाई अमेरिकाका धनी महिलामध्ये एक बनाएको छ।
फोर्ब्सको सन् २०२६ को अमेरिकाका धनी स्वनिर्मित महिलाको सूचीमा उनी ३२ औं स्थानमा छिन्।
बुधबार सेयर बजार बन्द हुँदाको मूल्य अनुसार एनभिडियामा रहेको उनको सेयरको मूल्य करिब ७५ करोड अमेरिकी डलर थियो। गत महिना कम्पनीको सेयर उच्च मूल्यमा कारोबार हुँदा उनको सेयरको मूल्य एक अर्ब डलरभन्दा बढी भएको रोयटर्सले जनाएको छ।
हुआङको बहिर्गमनपछि एनभिडियाको सञ्चालक समितिको पहिलो अध्यक्षका रूपमा हार्भी सी जोन्स नियुक्त भएका छन्।
एनभिडियाका अनुसार जोन्स सन् १९९३ देखि कम्पनीको सञ्चालक समितिमा छन्। उनले यसअघि सिनोप्सिसका प्रमुख कार्यकारी तथा कार्यकारी अध्यक्षका रूपमा काम गरेका थिए।
एनभिडियाको नेतृत्व परिवर्तन हुनुको पृष्ठभूमिमा हुआङसँग जोडिएका व्यक्तिगत सम्बन्ध र सम्भावित राष्ट्रिय सुरक्षा चासो सम्बन्धी विवाद पनि छन्।
रोयटर्सका अनुसार हुआङसँग जोडिएका दुईवटा विवाहबाहिरका सम्बन्धबारे समाचार सार्वजनिक भएपछि कम्पनीको सञ्चालक समितिले उनको नेतृत्वबारे निर्णय गरेको हो।
तीमध्ये एक सम्बन्ध चीनका लागि जासुसी गरेको आरोप लागेकी एक महिलासँग जोडिएको छ।
तर जासुसीसम्बन्धी आरोप पुष्टि भइसकेको छैन। एनभिडियाको सञ्चालक समितिले नोभेम्बर ८ मा जारी गरेको विज्ञप्तिमा हुआङ विदेशी गुप्तचर निकायको प्रभावमा परेको हुन सक्ने विषयमा स्वतन्त्र छानबिन सुरू गरिएको जनाएको थियो।
समितिले त्यति बेला हुआङ र उनको नेतृत्व टोलीप्रति विश्वास रहेको पनि बताएको थियो।
बिहीबार कम्पनीद्वारा जारी विज्ञप्तिमा भने हुआङले राजीनामा दिएको उल्लेख छ।
